gnüsslät

Tschämpien 2012

Roman Brunner, Bürglitüüfel






Fasnacht 2012: gnüsslät

2012 … Plakette sind's uf all Fäll gsi, womer das Jahr am Umzug verchauft händ – eher meh, will mir händ nämli kei einzigi me. Aber nöd nume das isch toll gsi, nei es hät eifach alles gstumme: d Chessletä mit en huufe Teilnehmer, Türggä-Buzzi-Ufzug mit ganz vill Chind und natürli au grosse Lüt, de Kostümball mit de Betty und em Jamie und natürli em nüüe Tschämpien Roman, d KiDi mit alte und nüüe Gsichter, en traumhafte Umzug bi traumhaftem Wätter, feini Suppe uf em Schuelhuusplatz und – oh du vebrännti Zeine – en chölige Türggä-Buzzi zum Abschluss!

Wobii, zum Abschluss isch natürli no d Uuslumpete cho, mit vollne Restaurants, gueter Stimmig, feiner Mehlsuppe, und was halt suscht no so dezue ghört.

Eis isch klar, es isch e super schöni Fasnacht gsi – danggä em Petrus, danggä allne Fasnächtler, danggä allne Bänggnerinä und Bänggner!!!


Der Umzug

Der Umzug chan cho! D Umzugswägä sind buut, d Gwändli sind so guet wiä fertig, und d Startlischtä isch au gmacht. Wer nöd bis am Samstig mag wartä, da chamer schomal inegüxlä...

Ganz bsunders froiet mir üs, dass mir passend zum Motto ä Original-Nüssler-Gruppä am Umzug dörfet begrüessä. D Gruppä Güdelmontag-Rott lauft am Umzug mit und zeigt nachem Umzug im Rahmä vu dä Guggäkonzert ihri Original-Maschgerade und natürli ihrä «ureigenschti» Narretanz, s'Nüsslä.


Plakettä malä

D Plakettä-Produktion isch abgschlossä.

A derä Stell scho äs grosses Dankeschön a alli flissigä Plakettä-Künschtlerinnä und Plakettä-Künschtler, Fädlerinnä und Fädler, Spiegelchläberinnä und Spiegelchläber und natürli au dä Abrollerin!

En chliine Iibick is Malstübli...

Wechsel in der Tschämpiens-Liig

Beim Tschämpienwurstessen vom 12.12.11 in der Chrönä Bänggä wurde ein Wechsel im Mänätschmänt vollzogen. Obertschämpien Leo wurde durch die beiden Tschämpien Rita und Sa-Biene abgelöst. Die Tschämpiens-Liig ist der einzige Verein, der jedes Jahr mindestens einen Eintritt verzeichnen kann. Dies ist der einzige Grund, wieso im Manätschmänt ab sofort zwei Personen mitschnurret.



Plakettä malä

D Plakettä-mal-Datä sind bereits bekannt und online. Also jetzt scho d'Täg im Januar reservierä!

S Plaketteteam fröit sich uf ä Huufä bekannti und nüüi Gsichter. Eifach ineluegä und mitmalä.

Achtung!!! Im «Nüs vu üs» sind no zwei Dezember-Datä publiziert wordä. Leider chömmer a dä säbe Täg nunig malä, will d Plakettä erscht im nüüä Jahr gliferät werdä chönd. Mir bittet alli Mal-Fans um Verständnis!

... än eimaligä 11er-Abig

Ölfte-ölfte-ölf: eifach chli zrugglehnä, sich underhalte loh und das schöni Datum gmeinsam chöne gnüüsse, ja genau, das hämmer welle. Und drum hät de 11er-Rat zumenä eimaligä 11er-Abig id Rietsporthalle iiglade, und ganz en huufe Bänggnerinä und Bänggner sind dere Iiladg gfolgt.

Bevor hät chöne glacht und gnossä werde, hämmer aber punkt 19 vor 19 di alljährlich HV müese abhaltä. Für eimal währed em Apéro, ständligs, hät d Romana zerscht mal s nüü Motto bekanntgäh und d Plakettä däzue zeiged, es heisst:

gnüsslät

Abschiid hämmer leider au no müese nä. Nach zwölf Jahr 11er-Rat hät sich d Erika Brändle entschide, uufzhöre und sich anderne Fasnachtssache zuezwände. Eri, mir danggäd Dir ganz herzlich für di letschte ölf Jahr, für alli Würstli wo verteilt häsch, für alli Plätz wo iiteilt häsch, eifach für alles!

Natürli hät üse Presi aber au chöne e würdigi Nachfolgeri präsentiere; di nüü 11eri heisst Mary Geisser, gäli Hagazussa und aagfrässni Fasnächtleri. Mary, herzlich willkomme bi üs im 11er-Rat!

Mir danggäd allne Gäscht fürs Cho, fürs Zuelosä, fürs Zueluegä, fürs Lachä, fürs Sich-verzauberä-loh, fürs Bliibä, fürs Essä und Tringgä, fürs Gnüüssä...!
Danggä aber au ganz villmal allne friiwilligä Hälfer, uhni Üch hettet mer das nöd chöne durezie!

Bis gli a dä Bänggner Fasnacht 2012!
En liebe Gruess vum 11er-Rat

Motto 2012:

gnüsslät




11.11.11: än eimaligä 11er-Abig

i dä Rietsporthallä Bänggä
Abigkasse und Türöffnig ab 19 Uhr
Programmbeginn 20 Uhr

Iitritt 11 Fränkli

Platzreservation möglich bi dä Erika Brändle bis 4. Novämber 2011,
Telefon 055 283 38 05 oder erika.braendle(ät)gmail.com

Fredy Schär WITZigster Liedermacher der Schweiz
Magic Dean Verblüffende Zauberei
Walti Dux ComedySinger – Das Lachen hat einen Namen!
und musikalischi Unterhaltig mit dä Waldruhspatzen

Für alli wo d’«ölfologisch»-Plakette aahänd gits ä chliini Überraschig.

11.11.11: Fasnachts-Hauptversammlig

Liebi Fasnächtlerinne und Fasnächtler

Mir vum 11er-Rat freued üs, dass mir üch (wie immer öppe zwei Persone pro Verein oder Kliggä) zur Fasnachts-Hauptversammlig vum Fritig, 11.11.11 dörfet ilade. Wills de 11.11.11 ja schliesslich nur eimal git, isch au d‘HV das Jahr speziell.

Fritig, 11. Novämber 2011, 19 vor 19 Uhr,
Rietsporthallä Bänggä

Mir behandlet die alljährliche Hauptversammligs-Traktande und freued üs, wen ihr nach de HV a üsem eimaligä 11er-Abig teilnähmed. De Itritt chostet 11 Fränkli pro Person. D’Erika Brändle nimmt Reservationä für üch und d‘Kliggä gern bis am 4. Novämber entgägä: erika.braendle(ät)gmail.com oder Tel. 055 283 38 05. Ihr chönd aber au spontan adä Abigkassä äs Billett chaufä.

Fasnächtlichi Grüess
11er-Rat Bänggä