Pfiifäbuur

Als Pfiifäbuur hät dä Paul Wissmann d’Bänggner Fasnacht aktiv mitgschtaltet. Sim erschtä Uftritt am Kostümball im Jahr 1976 sind nu 30 wiiteri gfolgt. Mit sinä Wiisheitä i greimter Form hät er jewiils under anderem Aktualitätä usem Buurästand zum Beschtä gäh. Passend zum Motto «Narrangschiere» isch dä Pfiifäbuur im Jahr 1988 zum Tschämpien erkorä wordä. 2006 hät er sich vo dä Kostümballbühni verabschiedet. Im Septämber 2018 händ mir üs ganz vu ihm müessä verabschiedä. Dä Pfiifäbuur wird üs mit sinerä humorvollä und gselligä Art in beschter Erinnerig bliibä.

Usschnitt us dä Büttä-Red vom Pfiifäbuur, Schmudo 2006:

Das mir än Alltag händ – än gsundä,
bruuchts au fröhlichi Fasnachtsstundä.

Es ghört zu üserä Entfaltig,
zur rächtä Ziit ä gmüetlichi Underhaltig.

Jetzt luäget guät zunenand, a denä luschtigä Täg,
dass ja nüt quer liit, ufem Wäg!

30 Jahr ha ich chönä a das Mikrofon,
jetzt möcht dä Pfiifäbuur i d’Pension.

Ich wünsch üch Glügg, vill Freud und vill Humor,
än Fasnachts-Gruäss vum Pfiifäbuur-Senior.